Samningur um lóð fyrir húsnæði viðbragðsaðila undirritaður
Ríki og borg hafa undirritað samning um lóð fyrir nýja björgunarmiðstöð, sem áætlað er að verði um 26 þúsund fermetrar. Lóðin liggur á milli Kleppsspítala og Holtagarða.
Í dag undirrituðu þau Dagur B. Eggertsson, borgarstjóri í Reykjavík, Jón Gunnarsson, dómsmálaráðherra, Guðmundur Árnason, ráðuneytisstjóri fjármála- og efnahagsráðuneytis og Guðrún Ingvarsdóttir forstjóri FSRE samning um lóð fyrir Björgunarmiðstöð.
Í Björgunarmiðstöð verður sameiginleg aðstaða fyrir löggæslu- og viðbragðsaðila á höfuðborgarsvæðinu, einkum embætti ríkislögreglustjóra, Lögregluna á höfuðborgarsvæðinu, Landhelgisgæslu Íslands, Tollgæsluna, Neyðarlínuna, Slysavarnafélagið Landsbjörgu og yfirstjórn Slökkviliðs höfuðborgarsvæðisins. Áætlað er að þörf sameiginlegs húsnæðis fyrir starfsemina sé um 26 þúsund fermetrar en lóðin sem er á milli Kleppssvæðis og Holtagarða er um 30.000 m2.
Björgunarmiðstöðin hefur gengið undir nafninu húsnæði viðbragðsaðila á höfuðborgarsvæðinu, en vinna að verkefninu hefur staðið yfir frá árinu 2019. FSRE hefur stýrt verkefninu frá upphafi. Undirritunin í dag er mikilvægur áfangi í verkefninu.
Lóðin liggur á milli Kleppsspítala og Holtagarða.