Framkvæmdasýsla og Ríkiseignir sameina krafta sína
Fjármálaráðherra ákvað 25. ágúst síðastliðinn að frá 15. september myndu verkefni og starfsfólk Ríkiseigna færast til Framkvæmdasýslu ríkisins (FSR). Ráðuneytið tilkynnti ávörðun ráðherra á vef sínum fyrr í dag.
Samþætt stofnun mun eftir breytinguna starfa undir heitinu Framkvæmdasýslan – Ríkiseignir og mun Guðrún Ingvarsdóttir veita henni forstöðu. Ákvörðun um tilfærslu verkefna byggir á ítarlegri greiningar- og stefnumótunarvinnu sem ráðuneytið og forstöðumenn stofnananna hafa unnið að síðastliðin misseri. Meðal þess ávinnings sem stefnt er að eru:
- Aukin skilvirkni í starfsemi ríkisaðila
- Aukið virði fyrir notendur aðstöðu
- Fjárhagslegur ávinningur fyrir ríkissjóð
- Efling íslensks byggingamarkaðar
Ríkiseignir urðu til árið 2015 við sameiningu Fasteigna ríkissjóðs og Land og auðlindaskrifstofu fjármála- og efnahagsráðuneytisins. Stofnunin heldur utan um eignarhald ríkisins á um 300 jörðum og rúmlega 500 þúsund fermetrum húsnæðis í um 380 eignum. 27 manns starfa hjá stofnuninni.
Framkvæmdasýslan varð til 1998 og er faglegur og miðlægur aðili á sviði framkvæmda og húsnæðisöflunar ríkisins. Um þessar mundir starfar stofnunin að um 130 verkefnum sem lúta að aðstöðuöflun- og uppbyggingu fyrir flestar greinar ríkisvaldsins. 40 manns starfa hjá FSR.